ہزار بار دبانے کو شہریار اٹھا

ہزار بار دبانے کو شہر یار اُٹھا
 مگر یہ شورِغریباں کہ بار بار اُٹھا
 یہ ٹُوٹ کر تو زیادہ وبالِ دوش ہوئی
 میں اُٹھ پڑا تو نہ مجھ سے اَنا کا بار اُٹھا
یقین رکھنے لگا ہے جو عالمِ دل پر
 تو پھر علائقِ دُنیا سے اعتبار اُٹھا

 عدُو سے اگلی لڑائی کا دن تو طے کر لیں

 چلے بھی جائیں گے شانوں پہ اپنی ہار اُٹھا
 زمینِ حُسن بھی شَق تھی سپہرِ عشق بھی شَق
 یہاں کسی سے نہ میری نظر کا بار اُٹھا
یہ بزمِ خاک نشیناں ہے، سوچ کر بیٹھو
 یہاں سے کوئی اُٹھا تو برائے دار اُٹھا
 زمیں سہار نہ پائی مِری شکست کا بوجھ
 کہ جتنی بار گرا ہوں میں اُتنی بار اُٹھا
 میں حُکمِ ضبط کو نافذ نہ کر سکا دل پر
 جہاں بھی ظُلم کو دیکھا، وہیں پُکار اُٹھا
 ملا کے خاک میں مجھ کو وہ جب چلا نیرؔ
 تو اُس کے پاؤں پکڑنے مِرا غُبار اُٹھا 

شہزاد نیر