میری جان لینے والے ترا دم نکل نہ جائے

میری جان لینے والے تِرا دم نکل نہ جائے

میرا عشق تو جواں ہے تِرا حسن ڈھل نہ جائے

مِرے حال پر کرم کر مِری زندگی کے داتا

تِرا نام لیتے لیتے مِرا دم نکل نہ جائے

نہیں خوف بجلیوں کا مجھے ڈر جو ہے تو یہ ہے

سرِ بزم بے ارادہ مِرا دل مچل نہ جائے

تری جستجو میں گم ہوں تِری یاد میں مگن ہوں

کہیں شامِ غم سے پہلے مِری صبح ڈھل نہ جائے

یہ زمانہ لاکھ بدلے اگر اپنا رخ تو کیا ہے

اے مِرے ندیم! لیکن تِرا رخ بدل نہ جائے

یہی آرزو ہے یا رب دلِ غمزدہ کی میری

یہ بلائے زندگانی مِرے سر سے ٹل نہ جائے

ہے بہار رقص فرما مِری کاوشِ نظر پر

کہیں گرتے گرتے میکؔش کوئی پھر سنبھل نہ جائے

میکش ناگپوری