محمول بر مبالغہ آرائی ہی نہ ہو

محمول بر مبالغہ آرائی ہی نہ ہو
رونق نمائی پرتوِ تنہائی ہی نہ ہو
آبِ حیات پیجیے پر سوچ لیجیے
پائندگی اجل کی پذیرائی ہی نہ ہو
اے شمع احتیاط ! کہ بے طاقچہ ہے تُو
پروانگی تِرے لیے پُروائی ہی نہ ہو
سدِ دعائے خیر ہٹا دو کہ یہ عذاب
بالواسطہ فقیر کی شُنوائی ہی نہ ہو
کروٹ بدلتی خاک پہ تکیہ نہ کیجیے
اونچائی کی سرشت میں گہرائی ہی نہ ہو
اک سلطنت میں رہتے نہیں بادشاہ دو
فتح چراغِ صبح کی پسپائی ہی نہ ہو
یہ موج موج پیاس کہیں پڑھ چکا ہوں میں
یہ لوحِ آب صفحۂ صحرائی ہی نہ ہو
ہیں خد و خال باعثِ گمراہئ خیال
حائل رہِ سلوک میں بینائی یہ نہ ہو
کیا اختتامِ قصۂ قدرت پہ سوچنا
حاصل حصول حاشیہ آرائی ہی نہ ہو

شاہد ذکی