ہر طرف انبساط ہے اے دل

ہر طرف اِنبساط ہے اے دل

اور ترے گھر میں رات ہے اے دل

عِشق ان ظالموں کی دنیا میں

کِتنی مظلُوم ذات ہے اے دل

میری حالت کا پوچھنا ہی کیا

سب ترا التفات ہے اے دل

اس طرح آنسوؤں کو ضائع نہ کر

آنسوؤں میں حیات ہے اے دل

اور بیدار چل کہ یہ دُنیا

شاطروں کی بساط ہے اے دل

صرف اُس نے نہیں دیا مجھے سوز

اس میں تیرا بھی ہات ہے اے دل

مُندمِل ہو نہ جائے زخمِ دُروں

یہ مری کائنات ہے اے دل

حُسن کا ایک وار سہہ نہ سکا

ڈُوب مرنے کی بات ہے اے دل

مصطفیٰ زیدی