کچھ اس طرح فرار غم کی راہ ڈھونڈتا رہا

کچھ اس طرح فرارِ غم کی راہ ڈھونڈتا رہا

مِرا جنوں  نئے نئے گناہ ڈھونڈتا رہا

تمام آرزوئیں دوزخوں کی نذر ہو گئیں

تمام عمر جنتوں کی راہ ڈھونڈتا رہا

مصیبتوں سے ہارنا مِرا مزاج ہی نہ تھا

مسرتوں کے لمحے گاہ گاہ ڈھونڈتا رہا

نئے نئے کھلونے چاہتا تھا قلبِ مضطرب

زمیں تو کیا نجوم و مہر و ماہ ڈھونڈتا رہا

اماں ملی  ہے جب سے ہو گیا ہوں اسلحہ بکف

کہاں سکوں ملا کہ جب پناہ ڈھونڈتا رہا

مسلم سلیم