داستاں میں تری کہیں کچھ بھی

داستاں میں تِری کہیں کچھ بھی

سچ تو یہ ہے کہ سچ نہیں کچھ بھی

حاسدوں نے کئے جتن کتنے

کر نہ پاۓ مجھے حزیں کچھ بھی

ذکر کرتا نہیں کوئی اس کا

اب میں سنتا نہیں کہیں کچھ بھی

پھل سے محروم ہیں شجر سارے

دے سکی کب انہیں زمیں کچھ بھی

اس کی نظروں میں با وقار نہیں

میرے سجدے مِری جبیں کچھ بھی

عشق اس کا تجھے بچا لے گا

لوگ کہتے رہیں کہیں کچھ بھی

جب سے دیکھا ہے جلوۂ جاناں

مجھ کو بھاتا نہیں کہیں کچھ بھی

ایسی محفل میں نورؔ کیا جانا

اپنی عزت جہاں نہیں کچھ بھی

نور سہارنپوری