علی عارف وہ جب دل تک رسائی دے رہا تھا

 علی عارف وہ جب دل تک رسائی دے رہا تھا

تو اُس کی آنکھ میں کیا کیا دکھائی دے رہا تھا

کہیں ٹھہرے ہوئے پانی نے مہکایا فضا کو

کہیں پر وہ رواں تھا، اور کائی دے رہا تھا

ذرا سا مُسکرا کے وقت نے آواز کیا دی

دلِ خُوش فہم یہ سمجھا، خُدائی دے رہا تھا

وہاں کچھ کان پڑتا ہی نہ تھا ہم جس جگہ تھے

جہاں پر ہم نہیں تھے سب، سُنائی دے رہا تھا

کسی گرداب میں کشتی نے جب دیکھا پلٹ کر

سہارا لو؛ مِرا ساحل دُہائی دے رہا تھا

جسے رکھا ہوا تھا خواب کے دیوار و در میں

اُسے لفظوں کے رستے سے رہائی دے رہا تھا

زمانے کے لیے یہ باعثِ حیرت تو تھا ہی

کہ دل آنکھوں کو درسِ پارسائی دے رہا تھا

عقب میں گِریۂ یعقوب کے دیکھا گیا ہے

سلوکِ ناروا بھائی کو بھائی دے رہا تھا

علی عارف