یہ قطرہ دریا بنے اتنا اختیار تو دے

 یہ قطرہ دریا بنے اتنا اختیار تو دے

مِرے وجود کے رشتے کو کچھ قرار تو دے

غبار بن کے سرِ رہگزر بکھر جاؤں

کوئی خلوص سے آوازِ انتشار تو دے

میں جھک کے اونچے پہاڑوں سے کھائیاں پاٹوں

مجھے بھی ایسا قدِ موجِ آبشار تو دے

نہ جانے کب سے لبِ رہگزار تپتے ہیں

انہیں بھی کوئی سحابِ زرِ غبار تو دے

یہ کیا کہ جاگتے گنبد کا شہر سو جائے

مچل کے گونجنے والی کوئی پکار تو دے

یہ دیکھ لینا یہی شہر آشنا ہے ترا

تُو اپنا دوسرا چہرہ ذرا اتار تو دے

بہت طویل تو ہے قوس! دھڑکنوں کا سفر

اسے تو اب بھی رخِ شہرِ لا حصار تو دے

قوس صدیقی