مہر و اخلاص کا مقتل ہے جہاں بھی یارو
ہے وہیں قافلۂ عصرِ رواں بھی یارو
قریۂ جاں میں لگی آگ تماشا دیکھیں
پر اسی قریے میں ہے اپنا مکاں بھی یارو
بیعتِ پیرِ مغاں ہم بھی کریں گے اک دن
ہے کوئی جام پئے تشناں لباں بھی یارو
آتشِ وقت میں اک روز پگھل جائے گی
فکر و احساس کی زنجیرِ گراں بھی یارو
کتنی لذت ہے غمِ عشق کی دلداری میں
کاش سمجھو مِرے زخموں کی زباں بھی یارو
اس میں تنقیدِ ستم کے ہیں بہت سے پہلو
چھین لو مجھ سے مِری طرزِ فغاں بھی یارو
متین سروش
مرزا متین بیگ
No comments:
Post a Comment