رہتا ہے جان عرش پہ تن ہے یہاں مرا

 رہتا ہے جان عرش پہ تن ہے یہاں مِرا

پایا میں لا مکاں سے پرے ہے مکاں مرا

حق مجھ میں آئینہ ہے میں ہوں حق کا آئینہ

شانِ صفا ہے حال نہاں و عیاں مرا

رہتا ہوں چشمِ اہلِ بصر کی نگاہ میں

ملتا ہے نکتہ داں کے سخن میں نشاں مرا

ذاتِ خدا ہے فہم میں وہم ہے خودی

علم الیقین سمجھو تو حق ہے گُماں مرا

دَیر و حرم میں بھُول کے رکھا نہ میں نے پاؤں

سینے میں اہلِ دل کے ہے جب سے مکاں مرا

میں وہ طلسم غیب و شہادت ہوں اے وطن

سنتا ہوں نام پر نہیں مِلتا نشاں مرا

وطن حیدرآبادی