ایسے تعمیر اُٹھا دی میں نے
پہلی دیوار گِرا دی میں نے
مجھ سے پُوچھا گیا میرا مسلک
تیری تصویر بنا دی میں نے
کوئی دیکھے نہ مِرا نظارہ
ایک چِلمن سی گِرا دی میں نے
راکھ کا ڈھیر ہوا ہے وہ بھی
آگ ایندھن کو لگا دی میں ںے
راہ میں دوست مجھے چھوڑ گئے
پھر توقع ہی مِٹا دی میں نے
کیا ہوا ڈُوب گیا ہے خورشید
کوئی قندیل جلا دی میں نے
جب مِرا بھائی مقابل آیا
اپنی تلوار گِرا دی میں نے
مجھ کو انصاف ملے یا نہ ملے
شب کو زنجیر ہلا دی میں نے
رشید سندیلوی
No comments:
Post a Comment