حد نظر سراب ہے پانی تو ہے نہیں

 حدِ نظر سراب ہے پانی تو ہے نہیں

صحرا کی گرد ہم نے اُڑانی تو ہے نہیں

چلتا نہیں ہے اس پہ ہمارا کچھ اختیار

یہ زندگی ہے کوئی کہانی تو ہے نہیں

کیوں دیکھ بھال اِس کی کریں ہم تمام عمر

یہ زخم کوئی اس کی نشانی تو ہے نہیں

یہ سچ ہے جان اس پہ لُٹا سکتے ہیں مگر

یہ بات جا کے اُس کو بتانی تو ہے نہیں

تو نے بُرا کیا جو بچھڑنے کی بات کی

اب نیند رات بھر ہمیں آنی تو ہے نہیں

تُو نے بنا لیا ہے محبت کو مسئلہ

دیوار آسماں تک اٹھانی تو ہے نہیں

رکھنا ہے خود کو شورِ جہاں سے الگ تھلگ

آواز اِس میں اپنی ملانی تو ہے نہیں

کرنا نہیں ہے تاج ہمیں عشق لازماً

اور داؤ پر یہ عمر لگانی تو ہے نہیں

تاج الدین تاج