ویرانئ حیات ہے بار گراں مجھے

 ویرانئ حیات ہے بارِ گراں مجھے

بے رنگ کر گئیں سخن آرائیاں مجھے

لے آئیں تیرے پاؤں میں حسنِ لازوال 

یہ حسرتیں، یہ خواب، یہ بے تابیاں مجھے

اے تاجدارِ کون و مکاں، شاہِ دو سرا 

آواز دے رہا ہے تِرا آستاں مجھے

اے نُورِ لم یزل مِری حالت پہ اک نظر

اب چھوڑتی نہیں ہیں یہ تاریکیاں مجھے

میں وہ کہ پاک فوج کا ادنیٰ سپاہی ہوں

تو وہ کہ اک نِگہ سے کرے آسماں مجھے

میں یہ کہ انتہائے عبادت ہو تیرا عشق

ڈھونڈیں اسی حوالے سے آشفتگاں مجھے

میں ناشناسِ مدحتِ خیر البشر کمال

میں اور نعتِ پاک، یہ جرأت کہاں مجھے

فضل اکبر کمال