تو نے کیا کیا نہ کیا ہم پہ بھی احساں جاناں

تُو نے کیا کیا نہ کیا ہم پہ بھی احساں جاناں

وصل بخشا ہے تو بخشا کبھی ہجراں جاناں

تجھ سے ملنے کا نہیں کوئی بھی امکاں جاناں

چھوڑنے لوگ چلے مجھ کو بیاباں جاناں

نہ رہا دل میں کوئی ایک بھی ارماں جاناں

کتنے ہم ہو گئے اب بے سر و ساماں جاناں

یہ بھی اِک رنگ محبت کا ہے ناداں جاناں

میری وحشت سے نہ ہو اتنا ہراساں جاناں

زندگی تجھ پہ جو کرتا ہوں میں قرباں جاناں

تُو مِری جاں ہے، جگر ہے مِرا ایماں جاناں

مے کدے کی تِرے آنے سے فضائیں بدلیں

آ گئی جوش میں پھر محفلِ رِنداں جاناں

اب تو ناصر کا اُڑاتا نہیں کوئی بھی مذاق

سی بھی دو ہاتھ سے تم میرا گریباں جاناں

حکیم ناصر