کیا کہیے کیا حجاب حیا کا فسانہ تھا

کیا کہیے کیا حجابِ حیا کا فسانہ تھا 

سب کچھ بس اک نگاہِ کرم کا بہانہ تھا

دیکھا تو ہر تبسمِ لب والہانہ تھا

پرکھا تو ایک حیلۂ صنعت گرانہ تھا

دنیا، امیدِ دید کی دنیا تھی دیدنی

دیوار و در اداس تھے، موسم سہانہ تھا

ہائے وہ ایک شام کہ جب مست، نَے بلب

میں جگنوؤں کے دیس میں تنہا روانہ تھا

یہ کون ادھر سے گزرا، میں سمجھا حضور تھے

اک موڑ اور مڑ کے جو دیکھا، زمانہ تھا

اک چہرہ اس پہ لاکھ سخن تاب رنگتیں

اے جرأتِ نگہ! تری قسمت میں کیا نہ تھا

ان آنسوؤں کی رَو میں نہ تھی موتیوں کی کھیپ

ناداں سمندروں کی تہوں میں خزانہ تھا

اے غم! انیس دل، یہ تری دلنوازیاں

ہم کو تری خوشی کے لئے مسکرانا تھا

اک طرفہ کیفیت، نہ توجہ نہ بے رخی

میرے جنونِ دید کو یوں آزمانا تھا

ہائے وہ دھڑکنوں سے بھری ساعتیں مجیدؔ

میں ان کو دیکھتا تھا، کوئی دیکھتا نہ تھا

مجید امجد