خبر نہیں کہ کہاں دستیاب ہوتے ہیں

خبر نہیں کہ کہاں دستیاب ہوتے ہیں
نہیں وہاں بھی جہاں دستیاب ہوتے ہیں
کُھلا ہوا ہے دریچہ، مہک رہا ہے باغ
تو آج کل وہ یہاں دستیاب ہوتے ہیں
ہر ایک چیز خریدار کو میسر ہے
کہ اس دکاں پہ گماں دستیاب ہوتے ہیں
جو دل پہ زخم لگے ہوں اگر وہ بھر جائیں
نشان ان کے کہاں دستیاب ہوتے ہیں
یہ دشت ہے، سو یہاں دربدر نہیں کوئی
مکان سب کو یہاں دستیاب ہوتے ہیں
اسی دیارِ محبت میں ہے قیام، جہاں
قدم قدم پہ زیاں دستیاب ہوتے ہیں

رمزی آثم