مجھے تو کل کسی اگلے نگر پہنچنا ہے

مجھے تو کل کسی اگلے نگر پہنچنا ہے
 متاعِ خواب تجھے اب کدھر پہنچنا ہے
 کراہتا ہے سرِ راہ درد سے کوئی
مگر مجھے بھی تو جلدی سے گھر پہنچنا ہے
ہواؤ کب سے ہیں سکتے میں زرد رو اشجار
برائے نوحہ گری کب ادھر پہنچنا ہے
ہمیں خبر نہیں کب جائیں اور کدھر جائیں
نکل پڑو کہ تمہیں وقت پر پہنچنا ہے
اسی لیے تو میں کم بولتا ہوں، سوچتا ہوں
کدھر کی بات کو پل میں کدھر پہنچنا ہے
کہیں تو ہونی ہے انجام کشمکش دل کی
کہیں تو معرکۂ خیر و شر پہنچنا ہے
درونِ بحرِ خلا دم نکل رہا ہے مرا
تو کیا مجھے بھی کسی سطح پر پہنچنا ہے
ابھی تو کتنے جہانوں کا سامنا ہے مجھے
کہاں تلک مِرا زادِ سفر پہنچنا ہے

سجاد بلوچ