کیا لکھا ہے سر دیوار کہانی کیا ہے

کیا لکھا ہے سرِ دیوار، کہانی کیا ہے
 اے مِرے شہرِ پُراسرار کہانی کیا ہے
 خواب مجبورئ حسرت سے پلٹ آتے ہیں
 روزنِ وقت کے اُس پار کہانی کیا ہے
 کن گُہر بستہ زمینوں کو ہوس جاتی ہے
کس لیے گرم ہے بازار، کہانی کیا ہے
 زیرِ لب طعنہ و دُشنام روا رکھتے ہیں
 کِس ہوا میں ہیں مِرے یار، کہانی کیا ہے
 نیند پہلے بھی نگاہوں سے ہوئی تھی رخصت
 دل بہلتا نہیں اِس بار، کہانی کیا ہے
 اب تو ہر زخم نمایاں ہے مِرے چہرے پر
 کیا کہوں اے مِرے غم خوار کہانی کیا ہے
 کھیل وہ کاتبِ تقدیر نے کھیلا ہے سعیدؔ
 پوچھتے پھرتے ہیں کردار کہانی کیا ہے

 سعید خان