ایسا بھی نہیں ہے کہ سدا رہتا ہے مجھ میں

ایسا بھی نہیں ہے کہ سدا رہتا ہے مجھ میں
اک حشر بہرحال بپا رہتا ہے مجھ میں
ان ٹوٹے ہوئے خوابوں کی گٹھڑی کے علاوہ
موجود ہے جو کچھ بھی ترا رہتا ہے مجھ میں
آتا ہے دمِ فجر تھکا ہارا مسافر
اور صبح سے تا شام پڑا رہتا ہے مجھ میں
خوش فہم ہَوا کو یہ خبر دو کہ پلٹ آئے
بجھتا ہی سہی، ایک دِیا رہتا ہے مجھ میں
تعمیرِ محبت ہو کہ مسماریٔ دل ہو
کوئی نہ کوئی کام لگا رہتا ہے مجھ میں
یہ بند اگر ٹوٹ بھی جائے تو عجب کیا
دریا جو ہمہ وقت بھرا رہتا ہے مجھ میں
کیا جانیے کس ڈر سے نکلتا نہیں دن بھر
غم ہے کہ کوئی چور چھپا رہتا ہے مجھ میں
برسا تھا مِرے دل پہ کبھی ابرِ مسلسل
اک باغ شب و روز ہرا رہتا ہے مجھ میں
تم لوگ سمجھتے ہو کہ میں خالی مکاں ہوں
معلوم بھی ہے، میرا خدا رہتا ہے مجھ میں
رُک رُک کے سرِ دشتِ گلو چلتا ہے شارقؔ
 اب سانس نہیں آبلہ پا رہتا ہے مجھ میں

سعید شارق