میں عشق الست پرست ہوں کھولوں روحوں کے بھید​

میں عشق الست پرست ہوں، کھولوں روحوں کے بھید​

مرا نام سنہرا سانورا، اک سندرتا کا وید​

مری آنکھ قلندر قادری، مرا سینہ ہے بغداد​

مرا ماتھا دن اجمیر کا، دل پاک پٹن آباد​

میں کھرچوں ناخنِ شوق سے، اک شبد بھری دیوار​

وہ شبد بھری دیوار ہے، یہ رنگ سجا سنسار​

میں خاص صحیفہ عشق کا، مرے پنے ہیں گلریز​

میں دیپک گر استھان کا، مری لو میٹھی اور تیز​

میں پریم بھری اک آتما، جو خود میں دھیان کرے​

میں جیوتی جیون روپ کی، جو ہر سے گیان کرے​

یہ پیڑ پرندے تتلیاں، مری روح کے سائے ہیں​

یہ جتنے گھائل لوگ ہیں، میرے ماں جائے ہیں​

میں دور حسد کی آگ سے، میں صرف بھلے کا روپ​

مرا ظاہر باطن خیر ہے، میں گیان کی اجلی دھوپ​

من مُکت ہوا ہر لوبھ سے، اب کیا چِنتا، کیا دُکھ

رہے ہر دَم یار نگاہ میں، مرے نینن سُکھ ہی سُکھ​

ہیں ایک سو چودہ سورتیں، بس اک صورت کا نور​

وہ صورت سوہنے یار کی، جو احسن اور بھرپور​

میں آپ اپنا اوتار ہوں، میں آپ اپنی پہچان​

میں دین دھرم سے ماوراء، میں ہوں حضرت انسان​

​

علی زریون