تو نے دریائے محبت کو اچھالا ہوا ہے

تُو نے دریائے محبت کو اچھالا ہوا ہے
اور اسے میں نے کناروں سے سنبھالا ہوا ہے
تم نے جو کام کیا تھا مِری تخلیق کے روز
ہم نے بھی ہاتھ اسی کام میں ڈالا ہوا ہے
تُو جو آیا ہے تو میں نے بھی جلایا ہے چراغ
تیرے آنے سے مِرے گھر میں اُجالا ہوا ہے
میری امید سے خورشید سنہرا ہوا تھا
 رات کا رنگ مِرے درد سے کالا ہوا ہے
اس نے ہر بدلہ اتارا ہے، اتارا جب سے
ہم نے انصاف فقط حشر پہ ٹالا ہوا ہے
لوٹتا پوٹتا رہتا ہے مِرے قدموں میں
یہ سگِ غم مِری دہلیز کا پالا ہوا ہے

ادریس آزاد