ہم گرچہ دل و جان سے بیزار ہوئے ہیں

ہم گرچہ دل و جان سے بے زار ہوئے ہیں
خوش ہیں کہ تِرے غم کے سزاوار ہوئے ہیں
اٹھے ہیں تِرے در سے اگر صورتِ دیوار
رخصت بھی تو جوں سایۂ دیوار ہوئے ہیں
کیا کہئے نظر آتی ہے کیوں خواب یہ دنیا
کیا جانیے کس خواب سے بیدار ہوئے ہیں
آنکھوں میں تِرے جلوے لئے پھرتے ہیں ہم لوگ
ہم لوگ کہ رسوا سر بازار ہوئے ہیں
کچھ دیکھ کے پیتے ہیں لہو اہلِ تمنا
مے خوار کسی بات پہ میخوار ہوئے ہیں
زنجیرِ حوادث کی ہے جھنکار بہر گام
کیا جرم کیا تھا کہ گرفتار ہوئے ہیں
اظہارِ غمِ زیست کریں کیا کہ ظفرؔ ہم
وہ غم ہیں کہ شرمندۂ اظہار ہوئے ہیں

یوسف ظفر