محبت فیصلہ ہے اک نظر کا

محبت فیصلہ ہے اِک نظر کا

اگرچہ دردِ دل ہے عمر بھر کا

وہی آنسو دوائے دردِ دل ہے

جو آئینہ ہے رنگِ چارہ گر کا

تِرے دَر کی تمنا، اللہ! اللہ

پتہ پوچھا کئے ہم اپنے گھر کا

ہوا ایسی چلی، کوئے بتاں سے

میں گزرا تو کوئی آنچل نہ سرکا

دہانِ زخم سے دل بولتا ہے

سخن ہرکارہ ہے اہلِ خبر کا

ق

بہت آباد ہے شہرِ خموشاں

کہ مسکن ہے یہاں ہر دربدر کا

یہاں سَستَا رہا ہے ہر مسافر

کہ حاصل ہے تھکن بارِ سفر کا

گداۓ دست و پا ہے ہر لحد میں

مگر کشکول خود کاسہ ہے سر کا

یہاں ٹوٹے ہیں مہ پاروں کے گجرے

یہاں بکھرا ہے گلدستہ سحر کا

یہاں شب، دیدۂ گریاں کا کاجل

یہاں دن نور، چشمِ دیدہ ور کا

صدا، نوحہ ہے اس بے حس فضا میں

ہوا، جھونکا ہے آہِ بے اثر کا

سکوں ایسا، کہ سناٹا ہے گھر میں

جنوں ایسا کہ صحرا بھی ہے گھر کا

کوئی دن ہے کہ اے یارانِ محفل

نہ ہو گا نام تک یوسف ظفرؔ کا

یوسف ظفر