پھرتے ہیں اب بھی دل کو گریبان کئے ہوئے

پھرتے ہیں اب بھی دل کو گریبان کئے ہوئے

جن وحشیوں پہ تِرے احساں کئے ہوئے

تجدیدِ عشق کیا ہو کہ برسوں گزر گئے

تجھ سے کوئی سخن بھی میری جاں کئے ہوئے

اب تجھ سے کیا گلہ ہو کہ اک عمر ہو گئی

ہم کو بھی قصدِ کوچۂ جاناں کئے ہوئے

دل سے ہوئی ہے پھر تِرے بارے میں گفتگو

تر آنسوؤں سے دیدہ و داماں کئے ہوئے

جی مانتا نہیں ہے کہ ہم بھی بھلا چکیں

 تیری طرح سے وعدہ و پیماں کئے ہوئے

کچھ ضد میں ناصحوں کی تجھے چاہتے رہے

 کچھ پاسداریِ دلِ ناداں کئے ہوئے

ہم وہ کہ تجھ کو شعر میں تصویر کر دیا

 صورت گرانِ شہر کو حیراں کئے ہوئے

بازار سرد تھا نہ خریدار کم نظر

 ہم خود تھے اپنے آپ کو ارزاں کئے ہوئے

اے عشق ہم سے اور بھی ہوں گے زمانے میں

اچھے بھلے گھروں کو بیاباں کئے ہوئے

کچھ ہم سے نامراد کہ پھرتے ہیں کوبکو

دل کو کسی فقیر کا داماں کئے ہوئے

وعدہ کیا تھا اس نے کسی شام کا کبھی

 ہم آج تک ہیں گھر میں چراغاں کئے ہوئے

اب اسکے جور سے بھی گئے ہم کہ جب سے ہیں

 اپنے کیے پہ اس کو پشیماں کئے ہوئے

یہ رتجگے قبول کہ آرام سے تو ہیں

رکھتے تھے ورنہ خواب پریشاں کئے ہوئے

ہم وہ اسیر ہیں کہ زمانے گزر گئے

"بند اپنے آپ پر درِ زنداں کئے ہوئے"

ترکِ وفا کے بعد ہوس اختیار کی

 اس کاروبار میں بھی ہیں نقصاں کئے ہوئے

جانِ فرازؔ! مرگِ تمنا کے باوجود

بھولے نہیں ہمیں تِرے احساں کئے ہوئے

احمد فراز