تجھے اس لیے نکالا

تجھے اس لیے نکالا

تُو پوچھتا ہے تجھے ایسے کیوں نکالا گیا

تمہارا جرم فضاؤں میں کیوں اچھالا گیا

تِرا غرور عدالت میں کیسے ٹالا گیا

تمہارے جھوٹ کے سینے میں کس کا بھالا گیا

بتا دوں تجھ کو درندے تمہارے دانتوں سے

مِرے غریب کسانوں کا خوں ٹپکتا ہے

تمہارا دستِ ستم تاڑ تاڑ کر ظالم

مِرے بچے کھچے گھر بار پر جھپٹتا ہے

مِرے اثاثوں کو جس طرح تُو نے لوٹا ہے

تجھے پتہ ہے کہ دل کتنی بار ٹوٹا ہے

میں خودکشی کے عوض تم سے روٹی مانگتا تھا

دھواں شکم کا مِری بے بسی سے پھوٹا ہے

تمہارے پنجوں میں مزدور کا جگر تڑپا

کہیں پہ بیٹا کہیں باپ بے اثر تڑپا

بتاؤں کس طرح تُو نے ہمارے بچوں سے

نوالے چھین کے کتوں کے منہ میں ڈالے ہیں

تمہارے مکر، ہوس، انتشار کے باعث

ہمارے ہونٹوں پہ تالے دلوں پہ چھالے ہیں

ہماری بھوک کا باعث تمہارا معدہ ہے

کہ جو نگر کا نگر ٹھونس کر نہیں بھرتا

تُو سازشوں سے لیے اقتدار کی خاطر

غضب خدا کا کسی کفر سے نہیں ڈرتا

حسن حسین ہی بن بیٹھتے ہیں بچے ترے

نبیﷺ کی ذات پہ تُو حرف لے کے آیا ہے

تمہارا راج مِری مفلسی کا باعث ہے

تمہارا سایہ نحوست کا کوئی سایہ ہے

تو پوچھتا ہے تجھے ایسے کیوں نکالا ہے

تجھے نکالا گیا اس لیے کہ اک تُو نے

تمام قوم کو مقروض کر کے مارا ہے

کمیشنوں کی غلاظت ہڑپ کری تُو نے

وطن کے سینے میں نیزا سدا اتارا ہے

تُو میرے ملک کے غدار سے جڑا ہوا ہے

تُو میرے دشمنِ خونخوار سے جڑا ہوا ہے

جو بے ضمیروں کے ٹولوں کو پال رکھتا ہے

تُو ایسے ٹی وی سے اخبار سے جڑا ہوا ہے

جو ارد گرد ترے غول ہیں درندوں کے

یہ میری دھرتی کے ہر اک چمن پہ قابض ہیں

یہ بھیڑیے مِرے سارے وطن پہ قابض ہیں

ہے کھا گیا مِری سب بیٹیوں کا داج بھی تُو

نگل گیا ہے مِرا کل بھی میرا آج بھی تُو

تُو جج خرید کے بنتا ہے شہنشاہ یہاں

پولیس والوں کو قاتل بنا دیا تُو نے

صحافیوں کو لفافوں پہ ڈالنے والے

بریف کیسوں کا تُو نے رواج ڈالا ہے

تِرے شعور پہ کرسی کا ہے فتور فقط

دل و دماغ پہ بس ڈالروں کا جالا ہے

تمہارے بچے پلیں لطفِ عیش و عشرت میں

اور ہم نے درد بڑی مشکلوں سے پالا ہے

تُو اب بھی پوچھتا ہے تجھ کو کیوں نکالا ہے

مِرا سوال ہے، جو سامنے نظر آئے

وہ طرزِ منصفی اپنایا کیوں نہیں جاتا

تمہارے جیسے ڈکیتوں کو قاتلوں کو یہاں

کسی چوراہے میں لٹکایا کیوں نہیں جاتا

تُو پوچھتا ہے تجھے ایسے کیوں نکالا گیا

فرحت عباس شاہ