سر پہ سرکار کی خاک کفِ پا رکھی ہے

 عارفانہ کلام حمد نعت منقبت

سر پہ سرکارؐ کی خاک کفِ پا رکھی ہے

ایسا لگتا ہے کہ رحمت کی ردا رکھی ہے

شرم سے میں نے نظر اپنی جُھکا رکھی

ہے سامنے ان کے مری فرد خطا رکھی ہے

تشنگی سرِ محشر کا ہمیں خوف نہیں

ہم نے لو ساقئ کوثر سے لگا رکھی ہے

کس طرح پہنچوں سرِ حشرمیں آقاؐ کے قریب

اہلِ محشر نے بڑی بھیٹر لگا رکھی ہے

اس یقیں پر کہ وہ آئیں گے ضرور آئیں گے

بزم میلاد نبیﷺ، ہم نے سجا رکھی ہے

یہ حسیں خواب بھی ہرشخص کی قسمت میں کہاں

سبز گنبد پہ نظر ہم نے جما رکھی ہے

آندھیاں اٹھتی ہیں کترا کے گزر جاتی ہیں

ہم نے ایمان کی قندیل جلا رکھی ہے

ہو مرض کوئی بھی مستغنی درماں ہو جائے

آبِ زمزم میں وہ قدرت نے شفا رکھی ہے

فتح مکہ کی قسم عام معافی کی قسم

درگزر کی مِرے آقاؐ نے بِنا رکھی ہے

لحنِ داؤدی کی تصدیق ہے وردِ قرآں

ہم نے آواز کی توقیر بڑھا رکھی ہے

نہ یقیں آئے تو مارہرہ میں دیکھو اے حق

یادگار شہِ لولاک لماﷺ رکھی ہے

علامہ عبدالحق بنارسی