تمام خلق مجھے مارنے پہ تل گئی ہے

تمام خَلق مجھے مارنے پہ تُل گئی ہے
قصور یہ ہے کہ اندر کی آنکھ کُھل گئی ہے
خدا کرے یہ حقیقت کوئی نہ جان سکے
کہ زہر بن کے اُداسی لہو میں گُھل گئی ہے
چمک اٹھا ہے اچانک جو دل کا آئینہ
کسی کے نُورِ نظر سے سیاہی دُھل گئی ہے
کہاں سے راہ مِلی ہے ہوائے تازہ کو
یہ دَر کُھلا ہے کہ دیوار کوئی کُھل گئی ہے
پَسِ چمن بھی چمن کی فضا میں زندہ ہوں
جدھر گیا ہوں، مِرے ساتھ بُوئے گُل گئی ہے
وہ چیز اپنے کسی کام کی نہیں، انصرؔ
زر و گُہر کے ترازو میں جو بھی تُل گئی ہے

سید انصر