خدا کی نظروں سے گر گئے جو
مِرے وطن
میری بے بس اداس دھرتی
مِرے پشاور کے نونہال آج
اپنی ماؤں کی گود کو چھوڑ
تیری گودی میں چھپ گئے ہیں
بڑے ہی سفاّک بے رحم لوگ ہیں
جو خدا کی بستی میں
ماؤں کے دل کچل رہے ہیں
وہ اپنے بُوٹوں سے
کِھلتے پھولوں کی کیاریوں کو مسل رہے ہیں
بڑے ہی معصوم ننھے دل ہیں
مگر دراڑیں
جو ان میں آئیں بہت بڑی ہیں
سوال بن کر
قدم قدم راہ روکے ہوئے کھڑی ہیں
کہو! ہمارا قصور کیا تھا
کہو! ہمارا قصور کیا تھا
سنو
تمہارے لیے یہاں اب
کہیں بھی جائے پناہ نہیں ہے
نہ جن کو مٹی پناہ دے گی
نہ آ سماں ہی مدد کرے گا
کہ چھوٹے بچوں کو قتل کر کے
زمین اور آسماں کی نظروں سے گِر گئے ہو
یہ تم ہو، جو آج مر گئے ہو
تمہی ہو، جو آج مر گئے ہو
شہناز پروین سحر
No comments:
Post a Comment