کل فکر یہ تھی کشورِ اسرار کہاں ہے
اب ڈھونڈ رہا ہوں کہ درِ یار کہاں ہے
پھر حُسن کے بازار میں بِکنے کو چلا ہوں
اے جنسِ تدبر کے خریدار! کہاں ہے
پھر روگ لگایا ہے مرے دل کو کسی نے
پھر بر سرِ تخریب ہے اک جلوۂ کافر
اے کعبۂ حکمت کے نگہ دار! کہاں ہے
ہنگامہ ہے پھر دل میں بپا سُود و زیاں کا
اے تجربۂ اندک و بسیار کہاں ہے
پھر عشق کے خورشید کی سر پر ہے کڑی دھوپ
اے عقل! ترا سایۂ دیوار کہاں ہے
پھر مائلِ دریوزہ ہے خود دارئ شاعر
اے جزر و مدِ غیرتِ فنکار کہاں ہے
پھر چرخِ تفکر پہ ہیں زلفوں کی گھٹائیں
اے فاتحِ اقلیمِ شبِ تار! کہاں ہے
پھر خواب کے گرداب میں غلطاں ہے دلِ زار
اے کشتئ اندیشۂ بیدار! کہاں ہے
راتوں کے اندھیروں میں ہے پھر اشک فشانی
اے روشنئ طبعِ گہربار! کہاں ہے
ادراک سے پھر عشق بغاوت پہ ہے تیار
اے فکر کی چلتی ہوئی تلوار! کہاں ہے
پائل کے کھنکنے میں ہے پھر دعوتِ زنجیر
اے بربطِ اطلاق کی جھنکار! کہاں ہ
پھر خون میں غلطیدہ ہے زیرِ لب و رخسار
اے قاطعِ زہرِ لب و رخسار! کہاں ہے
آوارہ ہے پھر دشت و بیاباں میں دلِ جوشؔ
اے تمکنتِ گوشۂ افکار! کہاں ہے
جوش ملیح آبادی
No comments:
Post a Comment