بہار آئے گی اور میں نمو نہیں نہیں کروں گا

بہار آئے گی اور میں نمو نہیں نہیں کروں گا
خزاں کو اب کے برس سرخرو نہیں کروں گا
دکھاؤں گا تِری بے چہرگی تجھے کسی دن
اور آئینہ بھی تِرے رو برو نہیں کروں گا
یہ دودھ کوزۂ آلودہ کے لئے نہیں ہے
میں ہر کسی سے تِری گفتگو نہیں کروں گا
کروں گا میں بھی تِرے ساتھ دشمنی لیکن
تِرے قبیلے کو بے آبرو نہیں کروں گا
مجھے نشان زدہ کوئی شے پسند نہیں
وہ زخم ہو کہ تبسّم، رفو نہیں کروں گا
کروں گا تیری غلامی اس انفراد کے ساتھ
کہ میں نمائشِ طوقِ گلو نہیں کروں گا
مجھے چراغِ خموشی جلانا آتا ہے
میں روشنی کے لیے ہا و ہو نہیں کروں گا
یہی وہ شے ہے جسے خود فریبی کہتے ہیں
یہ آرزو کہ تِری آرزو نہیں کروں گا
گلِ دریدہ نما خوشبوئے پریدہ نما
سفر کروں گا تِری جستجو نہیں کروں گا
میں جڑ کی طرح پسِ سایہ و ثمر شاہدؔ
نمود و نام کی خاطر نمو نہیں کروں گا 

شاہد ذکی