ہوا کی لہر کوئی چھو کے میرے یار سے آئی

ہوا کی لہر کوئی چُھو کے میرے یار سے آئی 

کوئی تازہ خبر یوں بھی سمندر پار سے آئی

لبوں سے کم اور آنکھوں سے بہت کرتا ہے وہ باتیں

بلاغت اس میں یہ پابندئ اظہار سے آئی 

وہ اس کی گفتگو، کلیاں چٹکنے کی صدا جیسے

یہ نرمی اس کے لہجے میں ہمارے پیار سے آئی 

کشش رکھتا نہیں اب پھول میرے واسطے کوئی

کہ مجھ تک ہر مہک اس زلفِ خوشبودار سے آئی

یہاں ہے جو بھی یوسفؑ، خود زلیخاؤں کا گاہک ہے

روایت یہ نئی کیا جانے کس بازار سے آئی

وہ اک مغرور سی لڑکی، خوشی جس کا تخلص ہے

مرے پاس آ گئی لیکن بڑے اصرار سے آئی 

اندھیروں نے قتیلؔ اکثر اسی دیوار سے جھانکا

اُتر کر دھوپ میرے گھر میں جس دیوار سے آئی

قتیل شفائی