غضب ہے جس کو وہ کافر نگاہ میں رکھے

غضب ہے جس کو وہ کافر نگاہ میں رکھے
خدا نگاہ سے اُس کی پناہ میں رکھے
برا ہوں میں تو مجھے رکھیے اپنے پیش نظر
برے کو چاہیے انسان نگاہ میں رکھے

پہنایا ہار گلے کا پھر اس پہ یہ طرہ
کہ پھول غیر کے تم نے کلاہ میں رکھے
جو شیخ دیکھ لے اک بار کیف مے خانہ
تو بھول کر نہ قدم خانقاہ میں رکھے
اُسی سے تو دل بے تاب ٹھیک رہتا ہے
جو تجھ کو باندھ کے زلفِ سیاہ میں رکھے
یہ فقر فاقہ کی خوبی نہیں ہے اے زاہد
کہ تیس روزے اگر ایک ماہ میں رکھے
سر نیاز ہو اس راہ میں قدم فرسا
جبیں سے پاؤں تِری جلوہ گاہ میں رکھے
تلاشِ دیر و حرم میں عبث نہ کیونکر ہو
تِرا ظہور ہی جب اشتباہ میں رکھے
خدا کے عشق میں اے داغؔ بت کی یاد رہے
ثواب ہم نے ملا کر گناہ میں رکھے

داغ دہلوی