نہاں ہے سب سے مرا درد سینۂ بیتاب

نہاں ہے سب سے مِرا درد ِسینۂ بیتاب 

سوائے دِیدۂ بے خوابِ انجم و مہ تاب

تمہیں تو خیر مِرے غم کدے سے جانا تھا 

کہاں گئیں مِری نیندیں کِدھر گئے مِرے خواب

سفینہ ڈُوب گیا، لیکن اِس وقار کے ساتھ

کہ سر اُٹھا نہ سکا پھر کہیں کوئی گرداب

عجیب بارشِ نیساں ہوئی ہے اَب کے برس 

صدف صدف شبِ وعدہ ہے اَور گُہر کمیاب

حُدودِ مے کدہ و مدرِسہ گِرا نہ سکے

یہ محرمانِ کلیسا، یہ عارفانِ کتاب

وہاں بھی بزمِ خِرد میں ہزار پابندی 

یہاں بھی محفلِ رِنداں میں سینکڑوں آداب

میں تشنہ کامِ غمِ آگہی کہاں جاؤں 

اِدھر شعُور کا صحرا، اُدھر نظر کا سراب

تُو اپنے جلوۂ عُریاں سے شرمسار نہ ہو 

یہی تمامِ نظارہ، یہی کمالِ حجاب

مصطفیٰ زیدی