اسی غم کی اوٹ ملا تھا وہ مجھے پہلی بار یہیں کہیں

اسی غم کی اوٹ مِلا تھا وہ، مجھے پہلی بار یہیں کہیں
کسی چشمِ تر میں تلاش کر اُسے میرے یار یہیں کہیں
یہ جو سمتِ عشق میں جھیل ہے، یہ جو سمتِ غم میں پہاڑ ہیں
مِری راہ دیکھ رہا نہ ہو، مِرا شہ سوار یہیں کہیں
مِرے دل کے باب نہ کھولنا، مِرے جان و تن نہ ٹٹولنا
کسی زاویے میں پڑا نہ ہو، وہ بُتِ نگار یہیں کہیں
پرِ کاہ، سبز کچور سا، قدِ سربلند، کھجور سا
مِرے جی میں تھا کہ سمیٹ لوں، خط و خالِ یار یہیں کہیں
فرسِ ہوا پہ سوار ہوں، کہ غبارِ ناقۂ یار ہوں
مجھے راستے میں نہ چھوڑ دے مِرا راہوار یہیں کہیں
طلبِ طلب میں چلا تھا میں، عجب اوجِ غم سے گِرا تھا میں
دل و جاں شکستہ پڑا تھا میں، تہِ آبشار یہیں کہیں
تِرے سیلِ لمس میں بہہ گئے، تنِ پا بہ گِل کھڑے رہ گئے
مِرے آس پاس تلاش کر، مِرے برگ و بار یہیں کہیں
فقط ایک گام کی راہ پر، فقط ایک نام کی آہ پر
مِری راہ دیکھ رہا نہ ہو، مِرا انتشار یہیں کہیں
تِرے سامنے، تِرے دیکھتے، مِری انگلیوں سے پِھسل گئے
مِرے ولولے، مِرے حوصلے، مِرا اِختیار یہیں کہیں
اُسے کوچ کرنا تھا، کر گیا، مِرے جسم و جاں سے گزر گیا
وہ غزالِ زاویۂ ختن، وہ گلِ غُبار یہیں کہیں
تِرے راستے میں ہوا ہوئیں، مِری خواہشیں، مِری کاہشیں
ہوسِ حواس بھی کھو نہ دے، تِرا بُردبار یہیں کہیں
اسی تنگ و تار اُطاق میں، اسی کُنج کے کسی طاق میں
غمِ یار رکھ کے گیا تھا میں، غمِ روزگار یہیں کہیں
یہ تہِ فصیل سراب سا، کبھی سیلِ بے ختن آب سا
مِری جاں! خیام پزیر تھے، تِرے جاں نثار یہیں کہیں

خالد احمد