لمحے کو بے وفا سمجھ لیجیے

لمحے کو بے وفا سمجھ لیجیے

جاوِدانی ادا سمجھ لیجیے

میری خاموشئ مسلسل کو

اک مسلسل گِلہ سمجھ لیجیے

آپ سے میں نے جو کبھی نہ کہا

اس کو میرا کہا سمجھ لیجیے

جس گلی میں بھی آپ رہتے ہوں

واں مجھے جا بہ جا سمجھ لیجیے

آپ آ جائیے قریب مِرے

مجھ کو، مجھ سے جدا سمجھ لیجیے

جو نہ پہنچائے آپ تک مجھ کو

آپ اسے واسطہ سمجھ لیجیے

نہیں جب کوئی مدعا میرا

کوئی تو مدعا سمجھ لیجیے

جو کبھی حالِ حال میں نہ چلے

اس کو بادِ صبا سمجھ لیجیے

جو کہیں بھی نہ ہو، کبھی بھی نہ ہو

آپ اس کو خدا سمجھ لیجیے

جونؔ ايليا