دل اسی سفاک فطرت پر ہے راضی بے بہا

دل اسی سفاک فطرت پر ہے راضی بے بہا
جس نے کی ہر ہر قدم پر زخم سازی بے بہا
ہے مزاج اپنا مزاجِ یار سے باندھا ہوا
اور مزاجِ یار میں ہے بے نیازی بے بہا
آج بھی سفاکیت کا بے بہا رجحان ہے
آج بھی مل جائیں گے دنیا میں نازی بے بہا
تھا سفیرِ عشق تنہا جانثاری کے لیے
مسجدِ کوفہ میں تھے یوں تو نمازی بے بہا
شاعروں کی شاعری میں واعظوں کے وعظ میں
عشق ملتا ہے حقیقی اور مجازی بے بہا
پیٹ بھرنے کے لیے دو وقت کی گندم نہیں
ہل چلانے کے لیے ہے گو اراضی بے بہا
آ کہ اب میں ہو چکا ہوں خوب جی بھر کر خراب
ہجر نے کر دی مِری کردار سازی بے بہا
تُو بھی اب چالاک بنتا جا رہا ہے افتخار
دیکھ کر اہلِ جہاں کی چالبازی بے بہا

افتخار حیدر