کوئی بھی حرف دعا اب اثر نہیں رکھتا

کوئی بھی حرفِ دُعا اب اثر نہیں رکھتا
میرا خُدا بھی تو مُجھ پر نظر نہیں رکھتا
ہوا کو کس لئے بے چِہرگی کا صدمہ ہے
یہاں تو کوئی بھی شانوں پہ سر نہیں رکھتا
وہ دشتِ خواب ہو ویرانہ ہو کہ صحرا ہو
جنوں کی راہ میں حدِ سفر نہیں رکھتا
انا ہو کس طرح آزاد جاں کے محبس سے
میرا وجود ہے دیوار، در نہیں رکھتا
بتاؤں کیسے جو میرے گُماں کا مُمکن ہے
ہوا کے دوش پہ رہتا ہے گھر نہیں رکھتا
نہ جانے کیا ہوا اُس کو کہ ایک مُدت سے
دِیا جلا کے سرِ راہ گزر نہیں رکھتا
بھنور کا اور بگولوں کا رقص جاری ہے
وہ دائروں کے مقدر میں ڈر نہیں رکھتا

شہناز مزمل