چھاؤں کی ہے طلب تو مثال شجر رہو

چھاؤں کی ہے طلب تو مثالِ شجر رہو

رہنے کا ڈھنگ یہ کہ رہو نہ، مگر رہو

تم بھی کھلی ہواؤں میں پرواز سیکھ لو

کس نے کہا ہے تم سے کہ بے بال و پر رہو

ترکِ تعلقات سے بہتر ہے یوں کریں

میں اپنے گھر میں رہتا ہوں تم اپنے گھر رہو

میری دعا ہے تیرے لیے، میرے ہمنفس

تم بھی مری طرح سے یونہی دربدر رہو

اس عہدِ بے بصر کی ضرورت ہنر نہیں

عزت جو چاہتے ہو تو پھر بے ہنر رہو

خبروں پہ تبصرے کا یہی ایک راز ہے

حالات و واقعات سے تم بے خبر رہو

صفدرؔ بچاؤ کی یہی صورت نظر میں ہے

اس دشتِ نارسا میں بھی محوِ سفر رہو

صفدر ہمدانی