دیکھنے کا جسے کل رات میں ڈھنگ اور ہی تھا

دیکھنے کا جسے کل رات میں ڈھنگ اور ہی تھا
صبح جب آئی، تو اس چشم کا رنگ اور ہی تھا
شیشۂ جاں کو مِرے اتنی نِدامت سے نہ دیکھ
جس سے ٹوٹا ہے یہ آئینہ، وہ سنگ اور ہی تھا
خلق کی بھیجی ہوئی ساری ملامت، اک سمت
اس کے لہجے میں چھپا تیر و تفنگ اور ہی تھا
کیا غرض اس سے، کہ کس گوشۂ عزلت میں رہا
شمع کے آگے جب آیا، تو پتنگ اور ہی تھا
لو چراغوں کی بجھانے سے، ذرا سا پہلے
میرے سردار کا، اندازۂ جنگ اور ہی تھا 

پروین شاکر