اور کیا میرے لئے عرصہ محشر ہو گا

اور کیا میرے لیے عرصۂ محشر ہو گا 

میں شجر ہوں گا تِرے ہاتھ میں پتھر ہو گا 

یوں بھی گزریں گی تِرے ہجر میں راتیں میری 

چاند بھی جیسے مِرے سینے میں خنجر ہو گا 

زندگی کیا ہے، کئی بار یہ سوچا میں نے 

خواب سے پہلے کسی خواب کا منظر ہو گا 

ہاتھ پھیلائے ہوئے شام جہاں آئے گی 

بند ہوتا ہوا دروازۂ خاور ہو گا 

میں کسی پاس کے صحرا میں بکھر جاؤں گا 

تُو کسی دور کے ساحل کا سمندر ہو گا 

وہ مِرا شہر نہیں شہرِ خموشاں کی طرح 

جس میں ہر شخص کا مرنا ہی مقدر ہو گا 

کون ڈوبے گا کسے پار اترنا ہے ظفرؔ 

فیصلہ وقت کے دریا میں اتر کر ہو گا 

احمد ظفر