کوئی جائے طور پہ کس لئے، کہاں اب وہ خوش نظری رہی

کوئی جائے طور پہ کس لیے، کہاں اب وہ خوش نظری رہی 

نہ وہ ذوق دیدہ وری رہی، نہ وہ شانِ جلوہ گری رہی 

جو خلش ہو دل کو سکوں ملے، جو تپش ہو سوزِ دروں ملے 

وہ حیات اصل میں کچھ نہیں، جو حیات غم سے بری رہی 

وہ خزاں کی گرم روی بڑھی تو چمن کا روپ جھلس گیا 

کوئی غنچہ سر نہ اٹھا سکا، کوئی شاخِ ِگل نہ ہری ریی 

مجھے بس ترا ہی خیال تھا، تیرا روپ میرا جمال تھا 

نہ کبھی نگاہ میں حور تھی، نہ کبھی نظر میں پری رہی

ترے آستاں سے جُدا ہوا، تو سکونِ دل نہ مِلا مجھے 

مری زندگی کے نصیب میں جو رہی تو دربدری رہی 

ترا حُسن آنکھ کا نور ہے، ترا لطف وجہِ سرور ہے 

جو ترے کرم کی نظر نہ ہو تو متاع دل نظری رہی

جو ترے خیال میں گُم ہوا تو تمام وسوسے مٹ گئے 

نہ جنوں کی جامہ دری رہی، نہ خرد کی درد سری رہی

مجھے بندگی کا مزہ ملا، مجھے آگہی کا صلہ ملا 

ترے آستانہِ ناز پر جو دھری جبیں تو دھری رہی 

یہ مہ و نجوم کی روشنی ترے حُسن کا پرتو نہیں 

ترا ہجر شب کا سُہاگ تھا، مرے غم کی مانگ بھری رہی 

رہِ عشق میں جو ہوا گزر، دل و جان کی کچھ نہ رہی خبر 

نہ کوئی رفیق نہ ہم سفر، مرے ساتھ بے خبری رہی 

ترے حاسدوں کو ملال ہے، یہ نصیرؔ فن کا کمال ہے 

ترا قول تھا جو سند رہا، تری بات تھی جو کھری رہی 

سید نصیرالدین نصیر