رقصِ فسوں
میں جو مشرق کے شبستانوں میں مصلوب ہوئی
میں جو مے خانۂ مغرب سے بھی منسوب ہوئی
پہلے تقدیس کے ناموں پہ مِرا سودا ہوا
اپنی حُرمت کا میں تاوان ادا کرتی رہی
اب بھی بازارِ تصرّف میں بہت سستی ہوں
میں وہ بازارِ ضرورت کی ہوں جنسِ مطلوب
حبسِ بے جا میں جسے رکھتا ہے اس کا محبوب
جسم ہی جسم بنائی گئی تصویر مِری
خواب در خواب ہی لکھی گئی تعبیر مِری
حلقہ در حلقہ بدلتی رہی زنجیر مِری
اک خرابے میں ہی ہوتی رہی تعمیر مِری
دائرہ وار مِرا رقصِ فسوں جاری ہے
ردِ تشکیل و تمنائے حزیں طاری ہے
تسنیم عابدی
No comments:
Post a Comment