دہر سے ناآشنا ہے خلق سے بیگانہ ہے​

دہر سے ناآشنا ہے خلق سے بے گانہ ہے​
کون کہہ سکتا ہے کہ کس دُھن میں تِرا دیوانہ ہے
ابتدا و انتہا کیا ہستئ موہوم کی​
ابتدا اک داستاں ہے، انتہا افسانہ ہے​
ہوش میں جب تک رہا تنہا رہا غمگیں رہا​
اب ہوں دیوانہ تو اِک عالم مِرا دیوانہ ہے​
ساغرِ اُمید کا یہ ظرف! اے قرباں شَوم​
بادۂ صد رنگ سے لبریز یہ پیمانہ ہے​
کون ہوسکتا ہے، کوئی بھی تو ہو سکتا نہیں​
جلوۂ جاناں، حریفِ جلوۂ جانانہ ہے
بے خبر، حیرت زدہ، خلوت نشیں، اندوہگیں​
حُسنِ خودبیں! دیکھ یہ شاید تِرا دیوانہ ہے​
اے تِرے قربان، خضرِؑ راہِ عشق و عاشقی​
تیری صورت سے نمایاں جلوۂ جانانہ ہے​
رہ روِ راہِ حقیقت، جا خُدا حافظ تِرا​
راہ میں لیکن ہر اِک منزل پہ اِک بُتخانہ ہے
گِرتا پڑتا آ تو پہنچا منزلِ مقصود پر​
اِس سے آگے کام تیرا، ہمتِ مردانہ ہے​
میں نے کیا دُنیا کو چھوڑا، مل گئی دُنیا مجھے​
مرکزِ اُمید عالم، میرا خلوت خانہ ہے​
صاف گوئی، حق نوازی رازؔ مُستحسن سہی​
لیکن اندازِ تکلم تیرا گستاخانہ ہے

راز چاند پوری