مری شراب تمنا مرے گلاس میں ہے

مِری شرابِ تمنا مِرے گلاس میں ہے

اسی لیے تو یہ منظر ابھی حواس میں ہے

نہ اشک پی کے میسر ہوئی وہ سیرابی

جو انتظار کے دو پتھروں کی پیاس میں ہے

میں اپنے آپ سے رہتا ہوں دور عید کے دن

اک اجنبی سا تکلف نئے لباس میں ہے

غلیظ مٹی نے پیڑوں کو سُوکھنے نہ دیا

یہ ہے ثبوت کہ فطرت بھی التباس میں ہے

کٹے پھٹے ہوئے دل کو نصیب ہوتا ہے

وہی گداز جو دُھنکی ہوئی کپاس میں ہے

بیان کرنے کو سات آسمان تھوڑے ہیں

جو کائنات کی وسعت خدا شناس میں ہے

اٹھا اٹھا کے عداوت کا بوجھ کاندھوں پہ، اب

جھکی ہوئی کوئی دیوار التماس میں ہے

ادریس آزاد