لطف وفا نہیں کہ وہ بیداد گر نہیں

لطفِ وفا نہیں کہ وہ بیداد گر نہیں
خاموش ہوں کہ میری فغاں بے اثر نہیں
ان کے بغیر تلخئ کام و دہن حرام
دردِ جگر ہے لذتِ درد، جگر نہیں
تم کیا گئے کہ سارا زمانہ چلا گیا
وہ رات دن نہیں، وہ شام و سحر نہیں
ہر ہر روِش معاہلۂ حسن و عاشقی
ہر ہر قدم فروغِ جمالِ نظر نہیں
بے باک چال، چال سے بے باک تر نظر
اب حسن تو بہت ہے، مگر فتنہ گر نہیں
سجدوں سے نامراد ہے جلوؤں سے ناامید
وہ رہگزر کہ اب جو تِری رہگزر نہیں
دنیائے چشم و گوش تو برباد ہو گئی
اب کچھ بغیر معرکۂ خیر و شر نہیں
زخموں سے چُور قافلہ، پُرخار راستے
اس میں تِرا قصور تو اے راہبر نہیں؟

ایم ڈی تاثیر
محمد دین تاثیر