وقت کے تقاضوں کو اس طرح بھی سمجھا کر​

وقت کے تقاضوں کو اِس طرح بھی سمجھا کر​

آج کی گواہی پر مت قیاسِ فردا کر​

تیرے ہر رویے میں بدگمانیاں کیسی​

جب تلک ہے دنیا میں، اعتبارِ دنیا کر​

جِس نے زندگی دی ہے، وہ بھی سوچتا ہو گا​

زندگی کے بارے میں اس قدر نہ سوچا کر​

حرف و لب سے ہوتا ہے کب ادا ہر اِک مفہوم​

بے زبان آنکھوں کی گفتگو بھی سمجھا کر​

ایک دن یہی عادت تجھ کو خوں رلائے گی​

تُو جو یوں پرکھتا ہے ہر کسی کو اپنا کر​

یہ بدلتی قدریں ہی حاصلِ زمانہ ہیں​

بار بار ماضی کے یوں ورق نہ الٹا کر​

خوں رلائیں گے منظر، مت قریب آ محسنؔ​

آئینہ کدہ ہے دہر، دُور سے تماشا کر​

​

محسن بھوپالی