فن تشہیر سے کوئی بھی بیگانہ نہیں ملتا​

فنِ تشہیر سے کوئی بھی بے گانہ نہیں ملتا​

جریدوں میں مگر حرفِ حکیمانہ نہیں ملتا​

ہمارے عہد سے تم کوہکن تک اِک نظر ڈالو​

یہ کارِ عشق ہے، اِس میں محنتانہ نہیں ملتا​

یہ کیسا دشت، کیسی سرزمینِ بے روایت ہے​

یہاں تو زیرِ دام آنے پہ بھی دانہ نہیں ملتا​

محبت پیشگاں پر ابتری کا دور آیا ہے​

کہ ان کو پیشکش ملتی ہے، بیعانہ نہیں ملتا​

اچٹتی سی نظر بے چین ہے شاداب کرنے کو​

کئی دن سے مگر وہ ننگِ ویرانہ نہیں ملتا​

کبھی تنہا جو ہوتا ہے خیالوں میں نہیں ہوتا​

وہ ملتا ہے مگر خود سے جُداگانہ نہیں ملتا​

عجب معیار ہے وعدہ خلافی کا محبت میں​

زرِ آزار تو ملتا ہے، ہرجانہ نہیں ملتا​

فنا بنیادِ ہستی پر نہ اِترانا، کہ بعض اوقات​

وسائل ہوں مگر مہلت کا پروانہ نہیں ملتا​

عجیب یکسانیت سی زندگی میں آ گئی محسنؔ​

بہت دن سے کوئی موضوعِ نظمانہ نہیں ملتا​

محسن بھوپالی