دل ناداں تجھے ہوا کیا ہے​

دلِ ناداں تجھے ہوا کیا ہے​
آخر اس درد کی دوا کیا ہے​
ہم ہیں مشتاق اور وہ بیزار​
یا الہٰی! یہ ماجرا کیا ہے​
میں بھی منہ میں زبان رکھتا ہوں​
کاش پوچھو، کہ مُدعا کیا ہے​
جب کہ تجھ بِن نہیں کوئی موجود​
پھر یہ ہنگامہ، اے خُدا! کیا ہے​
یہ پری چہرہ لوگ کیسے ہیں​
غمزہ وعشوہ و ادا کیا ہے
سبزہ و گُل کہاں سے آئے ہیں​
ابر کیا چیز ہے، ہوا کیا ہے​
ہم کو ان سے وفا کی ہے امید​
جو نہیں جانتے وفا کیا ہے​
ہاں بھلا کر تِرا بھلا ہو گا​
اور درویش کی صدا کیا ہے​
جان تم پر نِثار کرتا ہوں​
میں نہیں جانتا، دعا کیا ہے​
میں نے مانا کہ کچھ نہیں غالب​ؔ
مفت ہاتھ آئے تو برا کیا ہے​
​
مرزا غالب