دیکھے گی مری حسرتِ دیدار کسی دن
ہوتے ہوئے زینہ تری دیوار کسی دن
اندر سے مجھے کھود رہی ہے مری وحشت
نکلے گا یہیں سے مرا کردار کسی دن
وہ آنکھ غنیمت ہے خدا رکھے سلامت
مے خانہ تو ہو جائے گا مسمار کسی دن
لگتا ہے کہ میں حد سے نکل جاؤں گا آگے
ایسی ہی رہی گر مری رفتار کسی دن
پیروں سے پھسل جائیں نہ گھوڑے کی رکابیں
ہاتھوں سے نکل جائے نہ تلوار کسی دن
اقرار پہ تکرارِ سے تنگ آ کے یہ خلقت
کر دے نہ ترے حکم سے انکار کسی دن
مسند پہ تجھے روند کے رکھ دے نہ زمانہ
مٹی میں ملا کر تری دستار کسی دن
رستے میں ترے پھول بچھاتی ہوئی دنیا
بن جائے نہ راحتؔ کہیں دیوار کسی دن
راحت سرحدی
No comments:
Post a Comment