وہ ساتھ لے گیا قول و قرار کا موسم​

نذرِ فیض​

​

وہ ساتھ لے گیا قول و قرار کا موسم​

تمام عمر ہے اب انتظار کا موسم​

حیات اب بھی کھڑی ہے اسی دوراہے پر​

وہی ہے جبر، وہی اختیار کا موسم​

ابھی تو خود سے ہی فارغ نہیں ہیں اہلِ جمال​

ابھی کہاں دلِ امیدوار کا موسم​

اسے بھی وعدہ فراموشی زیب دیتی ہے​

ہمیں بھی راس نہیں اعتبار کا موسم​

جہاں گِرے گا لہو، پھول بھی کھلیں گے وہیں​

کسی کے بس میں نہیں ہے بہار کا موسم​

کبھی تو لوٹ کے دلداریوں کی رُت آئے​

سدا بہار ہے مدت سے دار کا موسم​

ہم اپنے آپ کو محسنؔ بدل کے دیکھیں گے​

بدل سکے نہ اگر کُوئے یار کا موسم​

محسن بھوپالی